وحشتنا بصحيح مصر
جمله قالها ولدها وش الفجر
هزت كيانى لاننى حسيتها
غابت بقالها زمان وما رايتها
غابت مع المناهده على القنوات
تاهت مع اولادها فى الاعتصمات
عتمت ملامحها مع اللى تركوها فى الازمات
سافرت مع اللى سافروا ولا رجعت
وحشتنى صحيح
وحشتنى ملامحها
راحت فى غيبوبه ما تحملت عمايلنا
ولادها تاهوا وتوهوا الدنيا معاهم
والدنيا صارت لخبطه وكانها لقياهم
لا رضعوا منها ولا ناموا فى حضنها
ولا شربوا من نيلها ولا تنفسوا هواها
لا حد قادر يدوس هواه
ولا فضلها على نفسه
طلعت مطامعهم وصارت كعكه بايديهم
الكل ماسك سكين يطلب نصيبه فيها
الكل عامل بطل وبده يحميها
وشايفه مخالفه ظلام وعتمه تنهيها
ومعارك كلام فى كلام
وجمل تختلف بالاماكن معانيها
ومصطلحات تلف تدور تدوخنا ف نواحيها
مواطنه واسلاميه ومبادئ
وديمقراطيه وعلمانيه ومعانى تقيله عليا
واشى حريه على شخصيه
ومعارك ما فاهمه فيها بيقولوا معارك سياسيه
واصوات بتعلى واصوات بتخفت
والصورة تبقى اخفت واخفت
وهى تايهه ما فاهمه حاجه
حد خايف على حد تايه زحمه وهيصه
والكل يجرى والكل يحكى وفكرونى بزفه عروسه
وحشتنى
وحشتنى ضحكتها الرايقه
والميه اللى كانت تجرى بجداول رايقه
وبناتها المغربيه على المصطبه بيغنوا
الزمن شاب وانتى شبه هو رايح وانتى جايه
انتى جايه ولا لسه بتفكرى تسيبينا
الصورة عتمه بس لسه شبابك
عاشقين ترابك
لسه الصغار بيحلموا يلعبوا على بابك
لسه حداهم من الصبر اللى يكفى
شايفاه ف قلوبهم زى مانا شايفه كفى
يزرعك أراضيكى حب وجناين تكفى
الصغار والكبار واللى فايت على اراضيكى يمسى
فهمانى ولا بالحكى ما عرفت انا اوفى
والكل يغزل فى ثوبك لفرحه لسه جايه
الصغار بيغزلوة بالبراءه
وشاب حالف يمين انه عمرة يستكين
الا اذا رجعتى شبه
قومى يامه وافرحى وفرحينا
بكرة جاى وجايب معه السعاده لينا
محمد ومدحت وسعاد ومينا
ان كان عليا بيكفى انى معاكى
حلوة وحشه انتى ساكنانى وانا سكناكى
قومى يالله طلى طله مع الفجر عليهم
وادعيلهم يامصر ان ربنا يهديهم
واتمنى سعدك يا امه يجى على اديهم
ادعيلهم يتوحدوا يكونوا قوة
يترهب عدوهم برة وجوه
ويبعد عنهم جار حقود فاكر بقوته فتوة
قومى يا امه ناديهم يزرعوا يعمروا صحاريكى
ويخضبوا رملها بالخضرة
قومى نادى على المريض والجعان والبرادن وصبريهم
قومى ياحلوة وحشنى صوتك
قومى طيحى فيهم وكونى كدا جامده
طيحى فى اللى النصب واللى سرق ولسه بيقاوح
واللى بيتفرج وخايف
واللى بيستهبل ونايم فيها
واللى عن الحق أعمى
واللى بيستعمى
واللى بيرشى وبترشى
قومى يا حلوة وبقششى علينا بـ طله
بعلو صوتى بقولك وحشتينا
وما تنسى اعلامى فاسد
بالجزمه تديه على راسه يمكن يفوق يفتكر
ان الاعلام رساله
ومهياش مصطبه وقوله وقواله
وان الفتن بين الناس جريمه وخراب
وجودهم بينا عذاب وصوتهم صوت غراب
ما يجى من وراه الا المرار والغم
ويوم ما نسمع صوته ما نشوف وراه غيرهم
ومدير مسئول ولا مسؤل
بالله عليكى يا أمه اضربيه قلم
يمكن ضميرة يصحى ولا يحس بألم
تعب الفقير من الفقر يا امايا
ودول بينا وبين الاصلاح زى عمايا
واقفين فى حلق المصلحه
ولاحد ناهى مصلحه
ولا بنشوف للخلق منهم مصلحه
ولا فى وجودهم مصلحه
اضربيهم يمكن يفوقوا
هتيجى يالله تعبت من السهر
بس الحديت معك مع مره حلو كتيير
ما انتى الحبيه اللى فى قلبى
وانتى الجميله ام قلب كبير
مهما عملنا وسوينا ديما مسامحه
يا ريت سماحتك تتنقل لينا
ولا جمالك يضمنا يغطينا
يدوب خلافاتنا اللى عكرت ليالينا
يصفى اللى كدرة اعلامنا ونخبتنا واعادينا
يدفى الحب اللى غرسته ايادينا
ينادى على قمر ليالينا يمد ايده من الضلمه يحمينا
وادعيلنا ربك يأمنا ويحمينا
ويحمى ارضك من كل اعادينا
هتسمعينى صوتك وحشتينا
االنهار شقشق تصبحى على خير
يملا ربوعك كلها خير
تصبحى على خير يا امى
يا ام الخير
ليست هناك تعليقات:
إرسال تعليق