الخميس، 20 فبراير 2014

اعملى زيها



اعملى زيها
بتنام بدرى عشان تقدر تصحى تصلى الفجر 
وتقول الاذكار 
هتقولى  عايزة  اعمل  فطار للعيال   وجهزهم واجهز نفسى للخروج للشغل
يابحتها عندها وقت
هى زيك بتعمل اللى انتى بتعمليه وبتشتغل  
بس بتقول الاذكار وتحفظ وتسمع الورد وهى فى المطبخ  وبتسمع قران وهى بتطبخ
اعملى زيها  وانتى رايحه الشغل  احفظى ايه كرريها طول اليوم
لما ترجعى من الشغل هتكونى حفظتيها زى اسمك
اعملى زيها
اول  لما أذن الاذان   قومى صلى علطول وافتكرى لا بارك الله فى عمل يلهى عن الصلاة 
وانتى فى المطبخ  هدى النهار على الاكل على لما تصلى او طفى النار  اذا امكن
اعملى زيها  ولو زوجك بيحب التلفزيون والاغانى متنكديش  عليه حياته وتعملى فيها ستنا زليخه واستعبطى احفظى ايتين وخليه يسمعلك  وكل شويه قوليله عايزة اتكلم معاك  شويه  واحفظى حديث ولا اقرى تفسير ايه وناقشيه فيها
اعملى زيها وقولى  لزوجك الشيخ مصطفى اسماعيل  كان اسطورة ومين تانى  من المشايخ كان زمان
هيسهر طول الليل  يدور على المشايخ
خليكى حنونه وكل شويه كوباية شاى بنعناع  وشجعيه واشكريه وهو بيعمل دونلود  للقران بيسمع وبيتسلطن  وبيفرح بنفسه وممكن ربنا يهديه  كمان
اعملى زيها ولو زوجك مش متعود يصلى فى الجامع تخيرى مواعيد خروجك وقت الصلاه وقولى ليه اتوضا لنتاخر وعند الجامع  اقترحى مش  تامرى نصلى فى الجامع  جماعه افضل  لنتاخر
اعملى  زيها  وكلمى حماتك على انها امك ولو مش بتحبيها مثلى انك بتحبيها   هيجى يوم وتحبيها وافتكرى انها ام  الراجل اللى اختارك من بين بنات حوا وسترك  وبيحبك وصابر عليكى
قبلى على ايدي حماتك  ما هى امك  ورضاها مهم ورضاها على زوجك  مهم لدخوله الجنه ورضا ذوجك عليكى مهم لتدخلى الجنه يبقى رضاها عليكى عشان تدخلى الجنه
اعملى زيها وكل  شويه  قولى لحماتك  انا بحسدك ياماما  وبدعيلك كل لما اشوف  ابنك    وتربيته وازى  حضرتك ربيته راجل ربنا يجازيكى خير خليها تحس ان تعبها اثمر 
اعملى زيها
واستحملى غيرة اخوات زوجك عليه وقدرى انه كان بيدلعهم وقل شويه فى الكلام دا عشان انتى شطبتى على وقته وفلوسه  
اعملى زيها واى حاجه بسيطه اهله يعملوها افضلى اشكريهم
اعملى زيها وخليكى عاقله مش  كل حاجه بينك وبين زوجك  ولا اهله  تقوليها لاهلك
اوعى حد يعرف حاجه عن مشاكلك وسامحى وكبرى الجمجمه ووسعى صدرك واحتوى الناس   دا الدنيا براح وكل ما بتوسع  التنفس بيكون اسهل  والاكسجين بيكون اكتر 
اعملى زيها
وتصدقى ولا يهمك على المساكين وما تسمعيش  العين بصيرة والايد قصيرة  واتذكرى تصدقى ولو بشق  تمرة
اعملى زيها  وعلمى اولادك ان الصدقه لا تنقص مال وان هناك ملك ينادى اللهم اعطى كل منفق  خلفا واعطى كل ممسك تلفا
علميهم الصدقه ليست مال   فقط وتبسمك فى وجهه اخيك صدقه
علمى اولادك دائما يكونوا فى عون زملائهم وان الله يكون فى عون العبد مادام العبد فى عون اخيه  علميهم كل  لما بيعيدوا ويشرحوا لزملائهم المعلومه بتثبت عندهم وربنا بيوفقهم
علميهم ان الاولاد  الفقرا فى الفصل  لم يختاروا ذلك وان يحسنوا معاملتهم ويتقربوا اليهم وان يشاركوهم اكلهم  واغراضهم  بدون تكبر ودونيه لان اكيد ربنا ميزهم بميزات اخرى لان ربنا عادل
علميهم النظافه فى البيت والشارع والمدرسه
عوديهم على الصلاه وشجعى الصبيان على الصلاه فى المسجد
علميهم مساعدة الجار ومش عيب   خليهم يكنسوا ويمسحوا السلم وعوديهم على الخدمه فى الشارع والحى
اعملى زيها
وعودى عيالك يقراو فى السيرة وناقشيهم
اعملى زيها وحبى كل الناس وادعى لكل الناس  واذكرى الله ديما وكل لما ماتكون بتفكرى فى شئ اقرى قران ولا سبحى ولا صلى على النبى خليكى ديما مشغوله
اعملى زيها وتنكسفيش  وانتى ماشيه فى الشارع ولاقيه حد شايل كتيير اعزمى عليها وساعديها لو كان معها اجرة التاكسى ماكنتشى شالت كرنبه والبطاطس وبقيه الخضار 
وانتى فى الشارع علميها و اتعلمى منها  


بصى بعدين اكملك  وما تنسى تدعيلها ان الله يرحمها دنيا واخرة ويخلص  نيتها ويبارك فيها   

ليست هناك تعليقات:

إرسال تعليق